पोखरा/शैक्षिक बचत तथा ऋण सहकारी लिमिटेड पोखराले आयोजना गरेको रक्तदानमा ३४ युनिट रगत संकलन भएको छ । पोखरा महानगरपालिका वडा नम्बर ८ सिर्जनाचोकस्थित सहकारीले रजत जयन्तीको अवसरमा शनिबार रक्तदान कार्यक्रमको आयोजना गरेको हो ।
रक्तदान कार्यक्रमको उद्घाटन गर्दै नेपाल रेडक्रस सोसाइटी कास्कीका सभापति उर्मिला खड्काले रगत दिनु पुण्यको काम भएको सुनाइन् । उनले हरेक ३ महिनामा रगत दिन सकिने र रगत दिदाँ अर्को व्यक्तिको ज्यान बच्ने बताइन् ।
सहकारीका अध्यक्ष लिलाधर बरालले सहकारीले व्यवसायका साथै सामाजिक उत्तरदायित्व समेत वहन गर्दै रक्तदान कार्यक्रमको आयोजना गरेको बताए । गणेशराज पहारीको संयोजकत्वमा भएको रक्तदान कार्यक्रम सञ्चालन कार्यवाहक सचिव गौरी चालिसेले गरेकी थिइन् ।
