पोखरा/पोखरा एभेन्जर्सले गृह मैदानमा समर्थक बढाउन र पोखरा एभेन्जर्स चिनाउनका लागि ‘नेपथ्य’ को कन्सर्ट आयोजना गरेको बताएको छ । शुक्रबार पोखरा रंगशालामा छोटो समयमा नेपथ्यसँग छलफल गरी कन्र्सटको आयोजना गरेको पोखरा एभेन्जर्सका अध्यक्ष सुवोध त्रिपाठीले जानकारी दिएका छन् ।

आइतबार कन्सर्ट र एभेन्जर्सको बारेमा जानकारी दिन आयोजित पत्रकार सम्मेलनमा बोल्दै उनले घरेलु समर्थकलाई एभेन्जर्स चिनाउनकै लागि कन्सर्टको आयोजना गरेको बताए । नेपाल प्रिमियर लिग (एनपिएल) को सबैभन्दा महँगो मुल्य रहेको एभेन्जर्सले दोस्रो सिजनको सुरुवातमा समर्थक बढाउनका लागि गण्डकी प्रदेशमा ट्रफी टुर सँग कन्सर्ट सम्पन्न गरेको हो । एनपिएलमा फे्रन्चाइज टिम एभेन्जर्स लिएकै दिनदेखी गण्डकी प्रदेशमा आफ्नै एकेडेमी स्थापना गरि भविष्यमा एनपिएल हुँदै अन्तर्राष्ट्रिय स्तरका खेलाडी विकास गर्ने लक्ष्य रहेको उनले बताए ।

‘पोखरा एभेन्जर्सलाई चिनाउन हामीले कन्सर्टको आयोजना गरेका हौं । मलाइ लाग्छ हामीले जुन उदेश्य राखेर आयोजना गरेका हौं । त्यो पूरा भएको छ । किनकी कन्सर्ट पछि हामीले धेरै व्यक्तिहरुले सम्पर्क गरि एभेन्जर्सलाई अब पछ्याउने बताएका छन्,’ उनले भने, ‘यो पोखरा एभेन्जर्स के रहेछ भनेर उहाँहरुले खोज्दै जाँदा एनपिएलको एउटा टिम रहेको र क्रिकेटसँग जोडिएको फ्रेन्चाइज टिम हो भन्ने थाहा पाएको व्यक्तिहरु पनि पायौं ।

क्रीकेट प्रति अन्य प्रदेशमा जति लगाव छ त्यो गण्डकीमा अलि कम भएको महसुस गरेका कारण क्रीकेट क्रेज बढाउने काममा लागेको सुनाए । उनका अनुसार नेपाथ्य कन्सर्टमा दुई हजार अर्लि बन्ड र विद्यार्थी छुटमा ९९९ रुपैयाँमा विक्रि गरेको र पाँच हजार आठ सय जर्सी एक हजार चार सय ९९ रुपैयाँमा विक्रि गरेको बताए । सोनम ब्रान्डको उक्त जर्सीको मुल्य एक हजार चार सय ९९ रुपैयाँ रहेको बताए । आठ हजार दर्शक मात्रै कन्सर्टमा सहभागि गराउने उदेश्य भएपनि कन्सर्टमा दश हजार भन्दा बढी सहभागी भएको बताए ।

कास्की जिल्ला खेलकुद विकास समितिका अध्यक्ष मिलन गुरुङले पोखरा एभेन्जर्स समितिसँग सहकार्य गर्दै खेलकुद विकासका लागि काम गर्ने उदेश्य राखेपछि कन्सर्ट गर्न दिएको बताए । उनले प्रति टिकटबाट आम्दानी भएको मुल्यको तीन सय रुपैयाँ समितिलाई आउने र त्यसमध्ये एक सय रुपैयाँ विद्यालयहरुमा खेल सामग्री वितरणका लागि खर्च गर्ने सुनाए । गुरुङले आगामी वर्ष पोखरा रंगशालाको फुटबल मैदानमा फ्लड लाइट जडान गर्नका लागि नेपथ्यले कन्सर्टको आयोजना गर्ने गरी व्यान्डका मुख्य व्यक्ति गायक अमृत गुरुङसँग छलफल भएको समेत सुनाए । एनपिएल आगामी मंसिर १ गतेदेखी सुरु हुँदैछ ।