पर्वत/जिल्लाको जलजला गाउँपालिकाले सञ्चालन गरेको एम्बुलेन्स सेवामार्फत गएको वर्ष ५ सय ४० जनाले सेवा लिएका छन् । गाउँपालिकाले अति विपन्न, ज्येष्ठ नागरिक, अपांगता भएका व्यक्ति, गर्भवती तथा सुत्केरी महिला र आकस्मिक स्वास्थ्य सेवाको आवश्यकता भएका नागरिकलाई निःशुल्क तथा अन्य नागरिकलाई सहुलियतपूर्ण रूपमा एम्बुलेन्स सेवा उपलब्ध गराउँदै आएको जनाएको छ ।
५ सय ४० लाभग्राहीमध्ये २ सय २० जनाले निःशुल्क सेवा प्राप्त गरेका छन् भने ३ सय २० जनाले सःशुल्क सेवा लिएका छन् । सःशुल्क सेवाबाट १४ लाख ५० हजार राजस्व संकलन भएको छ । १ वर्षको अवधिमा एम्बुलेन्सले ७ हजार ७ सय २४ लिटर इन्धन खपत गर्दै ८१ हजार १ सय ५ किलोमिटर दूरी तय गरेको छ ।
एम्बुलेन्स सेवाले विशेष गरी गर्भवती तथा सुत्केरी महिला, ज्येष्ठ नागरिक, अपाङ्गता भएका व्यक्ति लगायत लक्षित वर्गका नागरिकलाई स्वास्थ्य संस्थासम्म सुरक्षित र सहज पहुँच सुनिश्चित गर्न महत्वपूर्ण भूमिका खेलेको छ ।
गाउँपालिकाले नागरिकको जीवन रक्षा, स्वास्थ्य सेवामा सहज पहुँच र सेवाप्रतिको उत्तरदायित्वलाई प्राथमिकतामा राख्दै आगामी दिनमा पनि एम्बुलेन्स सेवालाई अझ व्यवस्थित, प्रभावकारी, पारदर्शी, जवाफदेही र नागरिकमैत्री बनाउँदै लैजाने गाउँपालिका अध्यक्ष राजुप्रसाद आचार्यले बताउनुभयो ।
‘गर्भवती तथा सुत्केरी, ज्येष्ठ नागरिक, विपन्न र अपाङ्गता भएकाहरूको लागि एम्बुलेन्स सेवा दिन सुरु गरिएको हो,’ आचार्यले भने, ‘स्थानीय सरकारले गर्ने काम पनि नागरिकसँग सिधा जोडिएका काम नै गर्ने हो । सेवा सामान्य लागे पनि यसले सयौँलाई प्राण दिएको छ । हामी शिक्षा र स्वास्थ्यप्रति बढी नै संवेदनशील छौँ ।’
