बागलुङ/आसन्न नवौं राष्ट्रिय खेलकुद प्रतियोगिताको लागि बागलुङमा ह्याण्डबल र सुटिङको प्रशिक्षण हुने भएको छ ।
आगामी असोज २८ गतेदेखि कात्तिक ३ गतेसम्म गण्डकी प्रदेशमा संचालन हुने प्रतियोगिताका लागि खेल्ने खेलाडीमध्ये बागलुङमा दुई खेलको बन्द प्रशिक्षण शुरु गरिएको हो । शुक्रबार बागलुङ नगरपालिकाका प्रमुख बसन्तकुमार श्रेष्ठले प्रशिक्षणको उद्घाटन गर्दै श्रेष्ठले खेल क्षेत्रबाट देशको नाम राख्ने काम भएको भन्दै अझैपनि नेपाली खेलाडीको सान र मान उचो हुने बताए ।
बागलुङ जिल्ला खेलकुद विकास समितिको सक्रियता र प्रदेश खेलकुद परिषदको आयोजनामा महिला ह्याण्डबल र सुटिङको प्रशिक्षण थालिएको हो । प्रशिक्षणका लागि बागलुङमा ५ जिल्लाका खेलाडीको प्रशिक्षण हुने समितिका अध्यक्ष कुमार खड्काले जानकारी दिए ।
बागलुङसहित कास्की, नवलपुर, गोरखा र स्याङजाका खेलाडी आउने छन् । प्रशिक्षणमा ह्याण्डबलतर्फ १५ जना र सुटिङ तर्फका १८ जना खेलाडी प्रशिक्षणमा आइसकेका हुन् । ‘एक दुइ दिनमै अन्य जिल्लाका पनि खेलाडी आउँछन्, त्यसका लागि हामी तयारी छौं’, खड्काले भने, ‘दक्ष प्रशिक्षकले प्रशिक्षण दिने भएकोले खेलाडीलाई पनि राम्रो कोच हुनेछ ।’
ह्याण्डबलका लागि भीमसेन शाक्य र सुटिङका लागि भगवती केसीले प्रशिक्षण गर्नेछन् । शाक्य समितिका सहायक प्रशिक्षक हुन् भने केसी सिड्नी ओलम्पिककी सहभागि खेलाडी हुन् ।खेल प्रशिक्षण उद्घाटन समारोह जिल्ला खेलकुद विकास समितिका अध्यक्ष कुमार खड्काको अध्यक्षता, सचिव तारा शर्माको संचालन र उपाध्यक्ष लोकेन्द्र केसीको स्वागतमा सम्पन्न भएको थियो ।
