पर्वत/जिल्लाको मोदी गाउँपालिकाको आयोजनामा प्रथम अध्यक्ष कप प्रतियोगिता तथा पाँचौँ राष्ट्रपति रनिङ शिल्ड प्रतियोगिता सञ्चालन हुने भएको छ ।
‘खेल अभियान : मोदीको पहिचान’ भन्ने मूल नाराका साथ मङ्सिर १४ गतेदेखि १९ गतेसम्म आयोजना गरिएको हो । प्रतियोगितामा एक लाख रुपैयाँ पुरस्कार रहेको अन्तरपालिका स्तरीय पुरुष भलिबल प्रतियोगिता आयोजना हुँदै छ । जसमा दोस्रो र तेस्रो हुने समूहले क्रमशः ७५ हजार र ५० हजार रुपैयाँ सहित शिल्ड, मेडल र प्रमाणपत्र पाउने छन् । भलिबल प्रतियोगिता जिल्लाका स्थानीय तहहरू बिचको प्रतियोगिता रहेको गाउँपालिकाले बताएको छ ।
यस्तै पुरुष डबलमा जिल्ला स्तरीय खुल्ला ‘बी’ र ‘सी’ ‘लेभल’ को ब्याडमिन्टन प्रतियोगिता पनि आयोजना गरिएको छ । जसको प्रथम, दोस्रो र तेस्रो पुरस्कारको रूपमा क्रमशः २० हजार, १० हजार र पाँच हजार रुपैयाँ सहित शिल्ड, मेडल र प्रमाणपत्र पाउने छन् ।
अध्यक्ष कपमा अन्तर समूह स्तरमा महिला रत्यौली प्रतियोगिता पनि आयोजना हुँदै छ । जसमा प्रथम, दोस्रो र तेस्रो बन्ने समूहहरूले क्रमशः २० हजार, १५ हजार र १० हजार रुपैयाँ नगद पाउने छन् । यस्तै अन्तर समूह स्तरीय लोक भोजन प्रतियोगितामा पहिलो, दोस्रो र तेस्रो बन्ने समूहहरूले पुरस्कार स्वरूप २० हजार, १५ हजार र १० हजार रुपैयाँ नगद पाउने छन् । यस्तै पहिलोलाई १० हजार, दोस्रोलाई १५ हजार र तेस्रोलाई पाँच हजार रुपैयाँ नगद पुरस्कार रहेको विद्यालय स्तरीय समूहगत लोक नृत्य प्रतियोगिता पनि सोही कार्यक्रममा आयोजना हुँदै छ ।
प्रतियोगितामा लठो तान्ने प्रतियोगिता, महिला उद्यमी तथा व्यवसायीहरुबीच मेच घुमाई प्रतियोगिता, खुल्ला महिला घैँटो फुटाउने प्रतियोगिता पनि आयोजना हुने छन् । सोही मौकाको अवसर पारेर आयोजना हुने विद्यालय स्तरीय राष्ट्रपति रनिङ शिल्ड प्रतियोगिताको पनि आयोजना हुँदै छ । तिलाहारको नवजागृत बहुमुखी क्याम्पस डिमुवामा आयोजना हुने प्रतियोगितामा जनप्रतिनिधि, कर्मचारी र शिक्षकहरूको बिचमा मैत्रीपूर्ण भलिबल खेल समेत आयोजना गरिएको छ ।
