बागलुङ/ दक्ष खेलाडी उत्पादन र युवाहरुलाई स्नोकर खेलप्रति आकर्षित गर्ने उद्धेश्यले बागलुङ नगरपालिका वडा नं. ३ फेन्ड्ली स्नोकर हाउसमा सञ्चालित दोस्रो खुल्ला स्नोकर प्रतियोगिताको उपाधी भिम रसाईलीले उचालेका छन् ।
गुठी युवा क्लब बागलुङले आयोजना गरेको फाइनल खेलमा बानपा–३ गुठीका रसाईलीले बानपा–२ रुद्रेपिपलका अभिनास बोसेललाई पराजित गर्दै उपाधी हात पारेका हुन् ।
प्रतियोगितामा बिजेता हुने रसाईलीलाई खसी, ट्रफी, मेडल प्रमाण–पत्र, उपविजेता हुने बोसेललाई २ वटा लोकल कुखुरा, ट्रफी, मेडल प्रमाण–पत्र प्रदान गरिएको थियो ।
त्यसैगरी प्रतियोगितामा उत्कृष्ट खेलाडी बानपा–३ का आशिष खड्कालाई घोषित गर्दै १ थान स्ट्रिकसहित प्रमाण–पत्र प्रदान गरिएको थियो । समापन कार्यक्रममा भष्ट्रचारविरुद्ध नागरिक अभियान उपाध्यक्ष एकबहादुर केसी संगमले मन्तव्य राखेका थिए ।
प्रतियोगिता गुठी युवा क्लवका सचिव सुवास रुचालको संचालन, उपाध्यक्ष अमन रुचालको गुप्ताको अध्यक्षता तथा बागलुङ नगरपालिका वडा नं. ३ का कार्यवाहक वडा अध्यक्ष अर्जुन खड्काको प्रमुख आतिथ्यतामा सम्पन्न भएको थियो ।
